საქართველოში დემოკრატიული სახელმწიფოს მშენებლობის გამოცდილებაზე ისაუბრა ისტორიკოსმა ირაკლი ირემაძემ, რომელმაც ახალგაზრდებს გააცნო 1918-1921 წლების საქართველოს პირველი დემოკრატიული რესპუბლიკა.

ახალგაზრდა თაობამ კარგად უნდა იცოდეს, თავისუფლების ეს მცირე პერიოდი რამდენად მნიშვნელოვანი გამოცდილებაა ჩვენი ქვეყნის ისტორიაში.

ეს იყო დემოკრატიული რესპუბლიკა, რომელმაც:

ბევრ განვითარებულ ქვეყანაზე ადრე ჩაატარა საყოველთაო არჩევნები ორივე სქესის მოქალაქეთა მონაწილეობით,

მიიღო კონსტიტუცია,

დააფუძნა სახელმწიფო ინსტიტუტები,

შეიმუშავა კანონმდებლობა ეროვნული და რელიგიური უმცირესობების დასაცავად, გასაქანი მისცა ქალთა უფლებებს,

შექმნა მრავალპარტიული სისტემური მმართველობის კარგი მაგალითი,

ჩამოაყალიბა პოლიტიკური აზრისა და დებატების კულტურა.

სპიკერმა გიორგი ფანიაშვილმა კი ახალგაზრდებს გააცნო ევროკავშირი, როგორც მშვიდობის, თავისუფლებისა და კეთილდღეობის გაერთიანება.

მოძრავი სახალხო უნივერსიტეტი საქართველოს გაეროს ასოციაციის სამოქალაქო განათლების პლატფორმაა, რომელიც ერთი საუკუნის წინ არსებულ პრაქტიკაზე, პირველი რესპუბლიკის დროს განვითარებული „სახალხო უნივერსიტეტის“ გამოცდილებაზე დაყრდნობით, ცდილობს, პროექტში ჩართოს საქართველოს 60-მდე დაბასა და სოფელში მაცხოვრებელი ახალგაზრდები.

მოძრავი უნივერსიტეტის ფარგლებში ტარდება ლექციები, სემინარები და სადისკუსიო შეხვედრები სოფლებსა და რეგიონულ ცენტრებში ადამიანის უფლებების, სამოქალაქო აქტივიზმის და ჩართულობის, გენდერული თანასწორობისა და სხვა მსგავსი მნიშვნელოვანი საკითხების შესახებ, რომლებიც ჩვენი ქვეყნის იდენტობის ნაწილიცაა.

ამ ყველაფერთან ერთად, მოძრავი უნივერსიტეტის მიზანია შრომის ბაზრის მოთხოვნებისა და მოლოდინების შესახებ ახალგაზრდების ინფორმირება და საქართველოში პროფესიული და უწყვეტი განათლების პოპულარიზაცია.

ლექციათა ციკლი გაგრძელდება და ახალგაზდებს კვლავ საინტერესო საკითხებზე მივაწვდით ინფორმაციას.